वारीतील सेवाभावाचा दीपस्तंभ : ७२ पालख्यांना अन्नदान करणारे दानशूर दिनकरराव वाटाणे

वाशिम : पंढरपूरच्या वारीत व इतरही पाई चालणाऱ्या लाखो वारकऱ्यांच्या भक्तीप्रवासाला सेवा, समर्पण आणि दानशूरतेची जोड देणाऱ्या व्यक्तींमध्ये वाशिम येथील समाजसेवक उद्योजक तथा वाटाणे लॉनचे संचालक दिनकरराव वाटाणे यांचे नाव अत्यंत आदराने घेतले जाते. गेल्या अनेक वर्षांपासून वारीच्या मार्गाने जाणाऱ्या तब्बल ७२ पालखी सोहळ्यांतील वारकरी भाविकांसाठी अन्नदान, मुक्काम, भोजन, निवास आणि विविध सुविधांची निःस्वार्थ सेवा करून वाटाणे परिवाराने वारकरी परंपरेत सेवाभावाचा आदर्श निर्माण केला आहे.

विठ्ठलभक्तांची सेवा हीच ईश्वरसेवा मानणाऱ्या दिनकरराव वाटाणे यांनी कोणत्याही प्रसिद्धीची अपेक्षा न ठेवता वारकऱ्यांच्या सेवेला आपल्या जीवनाचे व्रत बनविले आहे. दरवर्षी आषाढी वारीच्या काळात महाराष्ट्राच्या कानाकोपऱ्यातून पंढरपूरकडे प्रस्थान करणाऱ्या विविध पालख्यांचे वाशिम येथे प्रेमपूर्वक स्वागत केले जाते. वारकऱ्यांच्या मुक्कामासाठी प्रशस्त व्यवस्था, महाप्रसाद, स्वच्छ पिण्याचे पाणी, विश्रांती, भोजन तसेच आवश्यक सोयी-सुविधा उपलब्ध करून देण्याची परंपरा वाटाणे परिवाराने सातत्याने जपली आहे.

यावर्षीही विश्वरत्न माऊली ह.भ.प. श्री संत वासुदेव महाराज यांच्या पालखी सोहळ्याचे वाटाणे परिवाराने अत्यंत भक्तिभावाने स्वागत केले. पालखीचे पूजन, आरती, कीर्तन, वारकऱ्यांसाठी भोजन व मुक्कामाची उत्कृष्ट व्यवस्था करून विठ्ठलभक्तांची मनोभावे सेवा करण्यात आली.

"अन्नदान हे श्रेष्ठ दान" या भारतीय संस्कृतीतील मूल्याचा प्रत्यय वाटाणे परिवाराच्या कार्यातून सातत्याने येतो. हजारो वारकऱ्यांच्या चेहऱ्यावर समाधानाचे हास्य फुलविणारी ही सेवा केवळ दानधर्म नसून संत परंपरेप्रती असलेली श्रद्धा आणि समाजाप्रती असलेली बांधिलकी आहे.

वारकरी संप्रदायात सेवा, समता आणि प्रेमाचा संदेश कृतीतून जगणाऱ्या दिनकरराव वाटाणे यांच्या या उपक्रमाचे वारकरी, संतप्रेमी आणि समाजातील विविध स्तरांतून कौतुक होत आहे. वाशिम नगरीची सेवाभावी परंपरा अधिक समृद्ध करणारे त्यांचे कार्य अनेकांसाठी प्रेरणादायी ठरत असून, वारकरी चळवळीतील निःस्वार्थ सेवक म्हणून त्यांचा गौरव केला जात आहे.

विठ्ठलभक्तांची सेवा म्हणजेच विठ्ठलाची सेवा, या भावनेतून सुरू असलेली वाटाणे परिवाराची अन्नदानाची अखंड परंपरा आगामी काळातही अशीच अविरत सुरू राहो, अशी भावना वारकरी भाविकांकडून व्यक्त होत आहे. अशी माहिती वारकरी समाजसेवक गजानन हरणे यांनी प्रसिद्धी पत्रकाद्वारे कळविले आहे.