वंदे मातरम् – १५० वर्षांचा गौरवमहोत्सव अकोल्यात निलेश देव मित्र मंडळ तर्फे विद्यार्थ्यांसाठी प्रेरणादायी प्रदर्शनाचे आयोजन

अकोला : भारताच्या स्वातंत्र्यलढ्याला प्रेरणा देणाऱ्या वंदे मातरम् या अमर गीताला ३१ ऑक्टोबर २०२५ (तिथीनुसार) व ७ नोव्हेंबर २०२५ (तारखेनुसार) १५० वर्षे पूर्ण होत आहेत. या ऐतिहासिक निमित्ताने महाराष्ट्र शासनातर्फे राज्यभर वंदे मातरम् सप्ताह साजरा केला जात आहे. या उपक्रमाचा एक भाग म्हणून राजमाता जिजाबाई ट्रस्ट, ठाणे यांनी वंदे मातरम् विषयक एक अत्यंत आकर्षक आणि शैक्षणिक प्रदर्शन तयार केले आहे. या प्रदर्शनाचे अकोल्यातील नामांकित शाळांना निलेश देव मित्र मंडळ यांच्या वतीने उपलब्ध करून देण्यात आले. या प्रदर्शनात वंदे मातरम् गीताचा इतिहास, त्यामागील राष्ट्रीय भावना, बंकिमचंद्र चट्टोपाध्याय यांचे योगदान तसेच भारतीय स्वातंत्र्यलढ्यात या गीताने निर्माण केलेली जनजागृती याचे सजीव दर्शन घडते. विद्यार्थ्यांमध्ये देशभक्ती, मातृभूमीप्रेम आणि भारतीय संस्कृतीबद्दलचा अभिमान जागवणारे हे प्रदर्शन माहितीपूर्ण, भावनिक आणि प्रेरणादायी ठरले आहे. या उपक्रमाद्वारे “निलेश देव मित्र मंडळ” यांनी राजमाता जिजाबाई ट्रस्ट, ठाणे यांच्या सामाजिक प्रयत्नांना हातभार लावत अकोल्यातील विद्यार्थ्यांपर्यंत “वंदे मातरम्” ची प्रेरणा पोहोचवली आहे.