नवी दिल्ली : फेब्रुवारी 2022 मधील जीएसटी संकलनाची आकडेवारी जाहीर झाली आहे. फेब्रुवारी 2022 साठी एकत्रित जीएसटी महसूल 1,33,026 कोटी रुपये इतका जाहीर करण्यात आला आहे. जीएसटी संकलनाने 1.30 लाख कोटी रुपयांचा टप्पा ओलांडण्याची ही पाचवी वेळ आहे. फेब्रुवारी 2022 मध्ये, जीएसटी संकलन फेब्रुवारी 2021 च्या तुलनेत 18 टक्के अधिक आहे, तर फेब्रुवारी 2020 च्या तुलनेत संकलन 26 टक्क्यांनी वाढले आहे.
फेब्रुवारी 2022 मध्ये जीएसटी संकलन 1,33,026 कोटी रुपये होते. तर सीजीएसटी संकलन 24,435 कोटी, एसजीएसटी संकलन 30,779 कोटी, आयजीएसटी 67,471 कोटी रुपये आणि उपकर म्हणजेच सेस 10,340 कोटी रुपये होते. फेब्रुवारी महिन्यात नियमित सेटलमेंटनंतर केंद्र सरकारचा महसूल 50,782 कोटी रुपये आहे, तर राज्यांचा एकूण महसूल 52,688 कोटी रुपये आहे. फेब्रुवारी 2022 मध्ये जीएसटी महसूल संकलन 18 टक्क्यांनी वाढले असताना, फेब्रुवारी 2020 च्या तुलनेत संकलन 26 टक्क्यांनी वाढले आहे. फेब्रुवारी महिन्यात आयातीतून महसुलात 38 टक्क्यांनी वाढ झाली आहे.
अर्थ मंत्रालयाने आकडेवारी जाहीर करताना म्हटले आहे की, फेब्रुवारी महिना 28 दिवसांचाच आहे. त्याच वेळी, फेब्रुवारीमध्ये कोरोना महामारीच्या ओमिक्रॉन संसर्गामुळे, राज्यांनी आंशिक लॉकडाऊन, रात्री कर्फ्यू आणि निर्बंध देखील पाळले. दरम्यान जीएसटी संकलनाने 1.30 लाख कोटी रुपयांचा टप्पा ओलांडण्याची ही पाचवी वेळ आहे. त्याच वेळी, प्रथमच, जीएसटी सेस संकलन 10,000 कोटी रुपयांच्या पुढे गेले आहे. कारण ऑटोमोबाईल क्षेत्रातून रिकव्हरी परत आल्याची माहिती मिळत आहे.
Post Views: 264
